هذا بيان عاجل يتم نشره في جميع الصحف
أولآ .. طلباتي مشروعة ( القلب الأسود ينضف )
ورجوع الحقوق لأصحابها ومتقولوش عيل بيخرف
خلوا بالكم من الفتنة .. ومن فساد الـــــذمم
ومن النهارده متبقوش زي زمان . زى الصنم
أنا كده وهفضل أصرخ لحد ما نبقى من أوائل الأمم
خلاص خلصنا بقى وأصواتنا بقت مسموعة
اشتغلوا شويه ولا عجبكم جلابيتي المقطوعة
عاوزين ناكل ونشرب ونلبس .. الناس موجوعه
يعني كويس الناس خايفة في بيوتها ومفزوعة
جنبي الشمال وجعني .. آه عادى المرارة مفقوعة
يااااااااه عليكم .. كل شويه اضراب ووقفات
صاحبى ضاع منه ربع جنيه . يلا اعملوا مظاهرات
احترموا نفسكم بقى .. يا شويه بهلوانات
البلد بتخرب واستنوا قريب ثورة الجياع
يخربيت الغباء .. دم الشهداء ضاع
يا شعب بتاع مصلحتو حتى النخاع
بتقولوا مصر فوق الجميع .. طيب
سيبوا الحرامية تتحاكم وبلاش نعيب
واحنا نشوف نفسنا .. والفرج قريب
مش عاوز اقوم من مكانى .. زعلان منكم
اخبار حسني ومش ماما سوزان هى همكم
والله جعان وخايف من بكره .. وده ذنبكم
يوووه ما صدقنا ارتحنا شويه للاخوان لاقينا السلفيين
عاوزين كاميليا ترد عليهم السلام .. طيب يا مسلمين
استغفر الله بقى .. طبعآ هيرد عليهم المسيحيين
وهنفضل نزعق ويعلى صوتنا اللى كان مخنوق
شوفتم دمي فار ازاى وانا ما بصدق شويه يروق
يا جماعه علشان خاطري .. شويه من الذوق
ساعة الثورة قولنا على الشباب .. الله يحميكم
واسقطوا عمو فرعون اللى كان بيأذيكم
ممممممممممممم
بصوا بقى .. اللى تعملوه اعملوه .. حسبي الله فيكم
وانا خليني كده مستني تيجي دورية أمنية تاخدني
عشــــــان بتهدوا كـــــل ما حد يحاول يبني
ومش عاوز عشاني تعملوا شغب وتكسروا الاقسام
انا راضي عندآ فيكم عشان مش هو ده الاحترام
ايــوه ايــوه عــارف ... انتم عــاوزنها انقسام
