أحاول أسلى وأسولف وأضحك لناسي
والهم في داخلـي ياسعـود ذابحنـي
أحس كنـه بصـدري كاتـم أنفاسـي
مر(ن) يمسّيني ومـر(ن) يصبحنـي
أحيان تلقاني أضحك جاحد إحساسـي
ولاأنتبه غير دمـع العيـن فاضحنـي
كله سبب من شبكني شبـك قرناسـي
وأقفا وأنا فالشبك ياسعـود طارحنـي
ياسعود هذا سبب همـي وهوجاسـي
بعـده يعذبنـي وقـربـه يريحـنـي
ياسعود رح له وقلـه ويـن لاباسـي
وشف لي غيابه وش أسبابه وصارحني
أما يموت الرجـا وأستقبـل الياسـي
وألا يجيني منـه علـم(ن) يفرّحنـي
ياسعود قلـه علامـه قلبـه القاسـي
عقب الوفا والمحبه ليـش يجرحنـي
إن كان يبغاني أنسـا مانـي بناسـي
وإن كنت غلطان قولوا له يسامحنـي
